असो...!

नकळत्या वयातच वयात आले
आले की आणले गेले....?

आसुसलेल्या नजरांना 

कौतुक समजत राहिले...

असो,

आर्त गुलाबी दिवसांत
फुलपाखरांसम उडताना
क्षणोक्षणी, हळुवार मात्र
रंग सारे घेऊन गेले

असो,

स्वप्ना बिप्नाच्या राज्यात जगताना
फुलांचे गंध सांडताना
स्वर्गा बिर्गाच्या गाठी शोधताना
एक निरगाठ बांधून गेले!

असो,

हलक्या फुलक्या स्वप्नांना 
फुलावरील नाजूक दवांना
फुंकर उष्ण हवेची घालत,
मन मात्र करपवून गेले...

असोच....

वाळलेले पिंपळपान
खोल अगदी खोल
पुसले
लपवले
फेकून दिले....

तरीही असोच.... !!